Permanganato

Permanganatoa azido permanganikotik (HMnO₄) eratorriak diren gatzetako bakoitza da. Ezagunena potasio permanganatoa da (KMnO₄).

Permanganatoak ondo disolbatzen dira uretan, eta erraz kristaltzen dira. Perkloratoen antz handia dute. Kolore more bizia dute, eta kristalek beltzak dirudite. Oxidatzaile indartsuak dira, eta erraz erreduzitzen dira disoluzio azidoetan, gatz manganosoak eratuz; disoluzio neutroetan manganitoak edo manganeso dioxidoa eratu arte erreduzitzen dira, eta disoluzio alkalinoetan manganatoak eratu arte. Potasio permanganatoa desinfektatzaile gisa erabiltzen da, eta erredox erreakzioetan erreaktibo oxidatzaile gisa.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.